Pro 20 | NdeIBE | STEP | Iwayini lenza ukudelela lotshwala buyaxabanisa, okhohliswa yilezi izinto kahlakaniphanga.

Proverbs 20

1 Iwayini lenza ukudelela lotshwala buyaxabanisa, okhohliswa yilezi izinto kahlakaniphanga.

2 Ulaka lwenkosi lunjengombhongo wesilwane; lowo oyizondisayo udelela impilo yakhe.

3 Kumupha udumo umuntu ukubalekela ukuxabana, kodwa iziphukuphuku zonke ziphangisa ukuthenga inkani.

4 Ivila kalilimi ngesikhathi esifaneleyo; kuthi ngesikhathi sokuvuna liswele amabele.

5 Izifiso zenhliziyo yomuntu zingamanzi azikileyo, kodwa umuntu ozwisisayo uyazifinyelela.

6 Banengi abathi balothando olungapheliyo, kodwa ngubani ongamfumananga umuntu othembekileyo na?

7 Umuntu olungileyo uphila impilo encomekayo; babusisiwe abantwabakhe abamfuzayo.

8 Inkosi nxa ihlezi esihlalweni sayo isahlulela, iyakuhlungula konke okubi ngamehlo ayo.

9 Ngubani ongathi, “Ngiyigcinile inhliziyo yami imhlophe; ngihlanzekile kangilasono?”

10 Izisindo ezitshiyanayo – lezilinganiso ezitshiyanayo uJehova uyakuzonda kokubili.

11 Lomntwana waziwa ngezenzo zakhe, ngokuthi isimilo sakhe sihle, siqotho.

12 Izindlebe ezizwayo lamehlo abonayo – kokubili kwenziwa nguJehova.

13 Ungathandani lobuthongo uzakuba ngumyanga, hlala uvukile uzakuba lokudla okunengi.

14 “Kubi, kubi!” kutsho umthengi; esuka lapho usezincoma ngakuthengileyo.

15 Likhona igolide lamatshe aligugu amanengi, kodwa izindebe ezikhuluma ulwazi zilivelakancane.

16 Thatha isambatho salowo owenzela owezizweni isibambiso; sigcine uma ebambisela owesifazana ongaziphathanga.

17 Ukudla okuzuzwe ngenkohliso kumnandi emuntwini, kodwa kucina sekungathi udla itshebetshebe.

18 Nxa usenza amacebo dinga izeluleko; nxa usiyahlasela zuza ukuqondiswa.

19 Onyeyayo uyehluleka ukugcina imfihlo, ngakho yehlukana lomuntu okhuluma angathuli.

20 Aluba umuntu esethuka uyise loba unina, isibane sakhe sizacinywa abe semnyameni omubi.

21 Ilifa elizuzwa lula ekuqaleni alilakubusiswa ekucineni.

22 Ungabokuthi, “Lami ngizakulungisa ngalokhu ongenze khona!” Yekela, uJehova nguye ozakusiza.

23 UJehova uyazizonda izilinganiso eziguquguqulwayo, njalo kathokoziswa yizikali zokudlelezela.

24 Izinyathelo zomuntu zikhokhelwa nguJehova. Pho umuntu angayazi kanjani na indlela yakhe?

25 Yikuzithiya ukuthembisa ngokuphangisa ukupha ulutho, phambili umuntu aphinde azisole ngalesosifungo.

26 Inkosi ehlakaniphileyo iyabahlungula ababi; iyabagadlaza njengelitshe lokuchola.

27 Isibane sikaJehova siyawuhlolisisa umphefumulo womuntu; sihlolisisa ekujuleni kwemibilini yakhe.

28 Uthando lokwethembeka kuyayivikela inkosi; ngothando isihlalo sayo sobukhosi sivikelekile.

29 Udumo lwamajaha lusemandleni awo, izimvu zekhanda ziyinkazimulo yabadala.

30 Izidutshulo lamanxeba kugezisa okubi, lezibhaxulo zihlambulula ingaphakathi.